كتبت : وفاء المصري
هو ليه المحللين بقوا حافظين كلمتين و بيطلعوا يرصوهم علي حسب نتيجة الماتش
ايه علاقة ان اللاعيبه في اجازتهم راحوا افتتاح محل بمستواهم في الملعب ؟! فكرة ان اللاعيبه فاكيين و مش مهتمين بالماتش ده ليه علاقه بأن المدرب يعمل معسكر مغلق او علي الاقل يعمل حاله من التركيز و التأهب قبل الماتش باسبوع مش ان اللاعب في اجازته مايروحش افراح و لا يخرج مع مراته.
طب ما كل لاعيبة الزمالك كانوا في نفس الحفلات عادي
السؤال الاهم بقا هو الزمالك كسب بفرق مستوي اصلا ؟!
يا جماعه و الله الزمالك اتعادل في المباراه و كسب بركلات الترجيح
و زي ما ياسر غلط المثلوثي لبس فرقته ضربة جزاء في عز ما الماتش كان مقفول جدا و كان يستحق كارت احمر يعني كان هينهي المباراه تماما فبلاش الانتقادات تبقي مبنيه علي النتيجة فقط
بالنسبالي انتقاد لاعبي و مدرب الاهلي ده سببه ان المفروض الماتش ده يخلص سكور مش تروح لركلات الجزاء اصلا حتي لو بعدها كسبت
الفكره ان الزمالك راح بكوره وحيده علي مرماك و اتسجلت هدف يعني لاعبي الاهلي مش جاهزين و لا بدنيا و لا نفسيا للمباراه و بيجهزوا الاحتفالات في التدريب و بقوا اطفال بيحتفلوا بتسجيل ركلة ترجيح
بالمناسبه ناصر منسي اللي سجل التعادل مستواه ما يوديهوش يلعب حجز خماسي تحت بيتنا لكن كان مركز في شغله
و لا الزمالك ظهر بأداء استثنائي و لا الاهلي خسر في ال٩٠ دقيقه بالعكس ده استحواز الزمالك كان سلبي بدون اي تهديد للمرمي
لكن مجرد وصول الاهلي لركلات الترجيح ده فشل من المدرب و اللاعيبه و مجرد الرجوع للدفاع ده فشل من المدرب
الحاجه الاهم بقا هو انت منتظر انك تاخد كل البطولات من كل المنافسين و هما واقفين يتفرجوا عليك ؟
ليه بوتات ؟
طبيعي ان المنافس يعمل صفقات و يحاول يكسبك بس مش طبيعي ان لاعيبته يكون عندهم شراهه للمكسب و انت بتلعب برعونه و لا فارق معاك الماتش
و طبيعي انك تخسر و مش هتعيش العمر كله تكسب لأن دي طبيعة اللعبه بس علي الاقل تبقي عامل اللي عليك
طبيعي انك تتراجع بعد هدف التقدم لحد ما الشوط يخلص بس المشهد اللي في الصوره ده مش طبيعي و المشهد ده انا اتكلمت عنه في حلقة ليلة الماتش قبل ما يحصل اصلا ان كولر بيبالغ اوي في التراجع لما يسجل او لما الخصم يحاول يرفع خط دفاعه
في الصوره اللي تحت دي مدرب بيعمل تغييرات في الدقيقه ٦٤ في عز ما فريقه متراجع بتعليمات منه و متقدم ١/٠ مش ٢ و لا ٣ و بدل ما يطلب من أفشه الاستحواز و التحكم في الريتم بيقولهم احنا هنرجع لورا و نلعب علي المساحات
٤٥ دقيقه بتلعب علي التحولات قدام فريق اقل منك في كل حاجه ؟! ده ايه سوء التقدير ده ؟!
نفس الاسلوب اللي عملته في مباراة الترجي و مباراة نهائي الكاس ضد الزمالك و كل مره كان التوفيق بيحالفك و ما بتخسرش فانت فعلا متخيل ان كل مره التوفيق هيبقي معاك
ليه الاستسهال
ليه مش عايز تتعب عشان تكسب
ليه كل مدربين العالم عارفين ان الاستحواز هو افضل وسيله للدفاع و انت لسه مصمم ان دفاع المنطقه هو اللي هيكسبك
انت مدرب كبير اوي غير افكارك عشان عمر الطريقه دي ما كانت طريقة الأهلي اللي متسيد قارته من يوم ما اخترعوا الكوره
و ده مربط الفرس
